إنقاذ المصري يبدأ بإقالة بو جلبان وتعيين لجنة فنية من أبناء بورسعيد
 |
| إنقاذ المصري يبدأ بإقالة بو جلبان وتعيين لجنة فنية من أبناء بورسعيد |
في مباراة الإياب أمام سيمبا التنزاني، ظهر المصري البورسعيدي بشكل غير منضبط تمامًا، وكأن الفريق نزل الملعب بدون خطة واضحة أو هدف حقيقي. الغريب إن أنيس بو جلبان، مدرب الفريق، اختار إنه يبدأ المباراة بطريقة دفاعية بحتة، وده شيء مستفز لجمهور المصري اللي كان منتظر يشوف فريقه بيقاتل على بطاقة التأهل. الطريقة اللي لعب بيها في الشوط الأول كانت عشوائية وغريبة جدًا، ملامحها مش مفهومة، ومفيش أي تكتيك حقيقي، وكأن الفريق داخل يجرب أفكار على حساب البطولة. فريق بيدافع بالكامل داخل منطقة الـ18؟ طيب ليه؟ فين الجرأة؟ فين الضغط العالي؟ فين الشخصية اللي لازم تبان من فريق عايز ينافس؟!.
الشوط الثاني كشف حاجات كتير، أولها إن الفريق لو كان بدأ يضغط من بدري، كان ممكن يخرج بنتيجة أحسن. لكن للأسف، المدرب اختار إنه يخاف، وده مش أسلوب فرق البطولات. العك الكروي اللي حصل سببه الأول هو أنيس بو جلبان، مدرب مش قادر يفكر أو يتصرف تحت ضغط، وكل أفكاره غريبة عن الفريق والجمهور. من أول يوم وهو باين عليه إنه مش في مكانه، وفعلاً المقارنة بينه وبين علي ماهر مش في صالحه خالص. علي ماهر كان مدرب بيعرف إمكانيات لاعيبته وبيهاجم بشجاعة، إنما أنيس بيجرب فينا نظريات، ولا كأننا في دوري مدارس. لكن برضو نرجع ونقول، طول ما الإدارة نفسها مش واعية كرويًا، يبقى طبيعي نشوف اختيارات فنية بتضيع تعب فريق بحاله.
فريق بطولات ولا ساحة تجارب؟ المصري في خطر والإدارة شريكة في الجريمة!
الوضع دلوقتي لا يحتمل المجاملة ولا الاستمرار في طريق التجارب. من الضروري جدًا إن إدارة النادي المصري تتدخل فورًا وتبدأ في التفاوض مع مدرب أجنبي قوي عنده فكر واضح وخبرة في البطولات القارية، لأن اللي بيحصل حاليًا لا يليق بنادٍ كبير زي المصري. أنيس بو جلبان أثبت بما لا يدع مجالًا للشك إنه مش مناسب، وفترته انتهت خلاص، وشكرًا للإدارة اللي اختارته وفضلته على مدرب كبير ومخضرم زي علي ماهر، لكن للأسف هما كمان هيشيلوا المسؤولية معاه، لأن الاختيارات كانت فاشلة من بدايتها.
المشكلة الحقيقية إن مفيش فكر، ولا تخطيط، ولا استراتيجية، والقرارات كلها عشوائية، والمركب غرقت بأيدي ناس مفترض إنهم بيحبوا النادي، لكن الواقع بيقول العكس. لازم يكون في لجنة فنية حقيقية من أبناء بورسعيد، ناس كرويين بيفهموا اللعبة صح، مش مجرد أسماء والسلام. المصري محتاج صفقات تقيلة، تليق باسمه وتاريخه، ومحتاج مدير فني عالي ذو خبرة قارية ويكون جريء، ومحتاج إدارة كرة تشتغل بعقل مش بعشوائية. ولازم مستر كامل أبو علي يعرف إن الناس اللي حواليه هما السبب في الكوارث اللي بتحصل، رغم إنه بيصرف وبيعمل اللي عليه، لكن التدخلات اللي حواليه بتهد اللي بيبنيه. النادي في طريق الانهيار لو مفيش وقفة صارمة وإعادة ترتيب من جوه، قبل ما الجمهور يفقد الأمل بالكامل.
