ننقل بشفافية أخبار الجمهور: هذا ما جاء من جماهير المصري البورسعيدي عقب الخروج من الكونفدرالية، الجماهير قد وصلت لمرحلة الانفجار.. مش معقولة اللي بيحصل في النادي هذا البيان من جماهير المصري بداخل الشارع البورسعيدي
النادي كدة ماشي بتفكير ودماغ المسؤولين اللي طفشو علي ماهر واللي طفشو برده حسام حسن، والمسؤولين دول اللي حوالين مستر كامل هما اللي جابو انيس بو جلبان وعشان فضيحتهم بقت بجلاجل خدو قرار بتجديد الثقه في انيس بو جلبان عشان عايزين يثبتو لجمهور بورسعيد انهم ناجحين رغم اختيارهم لأنيس! هو فيه عته أكثر من كده ده احنا كا جمهور مشفناش كده من علي ماهر ولا من حسام حسن، تقوم انت مجدد الثقه لراجل انت جايبه مطلعك من كونفدرالية، وكأس مصر، ورابطه؟ لا لا لا كده كتير ودي عشوائية غير مرغوب فيها مع جماهير بورسعيد. لأن جماهير بورسعيد تطالب بلجنه كورة فنيه حقيقية او رحيلكم لأن كده بانت قوي دي حاجه بقت اوفر قوي.
المصري فوق الجميع
جماهير النادي المصري تطالب برحيل انيس بو جلبان وتطالب كامل ابو علي بتعاقد مع مدير فني اجنبي، وتطالب بلجنة كورة ولجنة تخطيط فنية حقيقية من ولاد بورسعيد، او جلب رموز كروية ذات قيمة كروية تكون فاهمه كورة مش ممشياها بالفلهوة والرغبات والمؤامرات.
الجمهور البورسعيدي بيضغط بكل قوة، وبقى فيه مطلب جماهيري واضح وصريح: إقالة المدير الفني أنيس بو جلبان فورًا! الناس مش ساكته ومش هتسكت، لأن الكورة في بورسعيد مش لعبة، دي حب وانتماء، والنادي المصري مش أي نادي، ده كيان كبير ليه تاريخ وجمهور بيغير عليه أكتر من روحه.
إحنا بنطالب الإدارة تفوق وتصحي من غفوتها، وتعرف إن النادي محتاج إصلاح حقيقي مش مسكنات. مش هنشوف بطولة ولا حتى فريق محترم غير لما يكون فيه لجنة كورة فنية حقيقية، لجنة من ولاد بورسعيد، من اللي عاشوا في شوارعها، من رموزها الكروية القديمة اللي فاهمة وعارفة قيمة النادي وجمهوره.
إحنا مش بنطلب المستحيل، بنطلب لجنة تخطيط كروي فيها ناس زي الكابتن محسن صالح، أو على الأقل ناس فاهمة كورة، بعيد تمامًا عن المصالح الشخصية والمؤامرات حسب المزاج.
- إحنا عايزين واحد بيشتغل لحب بورسعيد، واحد فاهم، عنده رؤية، مش بيشتغل علشان منصب ولا مجاملة. أما الناس اللي حوالين الأستاذ كامل أبو علي، للأسف الشديد، لا يصلحوا يديروا كشك كازوزة، مش نادي بحجم المصري! دائمًا اختياراتهم فاشلة، والدليل إنهم مشيوا علي ماهر، الراجل اللي عمل بصمة، وقبله حسام حسن، وآخرهم جابولنا مدرب اسمه أنيس بو جلبان، اللي محدش شافله بصمة ولا شخصية، مدرب شكلي، جبان، وبعيد تمامًا عن طموحات المصري وجماهيره.
نادي المصري أكبر منكم كلكم!
يا أستاذ كامل، افهمها: الناس اللي حواليك بيوقعوا النادي، ومفيش حد فاهم كورة فيهم! والجماهير مش هتفضل ساكته، دي نار تحت الرماد، لأننا تعبنا من الفهلوة والعشوائية وسوء الاختيارات. يا جماعة، والله العظيم، مفيش بطولات من غير لجنة كورة مدروسة، ولا من غير مدير فني أجنبي قوي، صاحب سيرة ذاتية محترمة وشخصية تقيلة، مدير فني هدفه يحقق بطولات مش يجي يلم يوميته ويمشي.
إما تصحوا وتصلحوا، يا إما الناس هتكره تشجيع النادي، وده اللي محدش يتمناه. رجعوا الكابتن علي ماهر، أو هاتوا مدرب يليق بتاريخنا، مش تجيبوا حد من على باب الله وتقولوا نجربه، إحنا مش حقل تجارب! كفاية بقى، وربنا ينتقم من كل واحد كان سبب في اللي حصل لعلي ماهر، وقبلية الكابتن حسام حسن، وكل ده سببه المسوؤلين اللي عاملين فيها بيفهمو كورة اللي حوالين مستر كامل ابو علي.
المجلس الحالي عاوز يبقى هو رقم واحد قدام ابو علي حتى لو علي حساب المصري، عاوزين يوصلوا للراجل أنهم اوفياء و خايفين عليه حتى لو ع حساب المصري و الدليل مفيش مدير كوره أو لجنه تعاقدات دخلت النادي في وجود المجلس الحالي عشان عاوزين يكونوا هما رقم واحد ف اي حاجه.
المصري البورسعيدي فريق كبير، وجمهوره كبير، ومش عايز غير إدارة واعية، تختار صح، تخطط صح، وتشتغل من أجل النادي مش لمصالح شخصية. وهذا ماجاء بكل شفافية من جمهور الشارع البورسعيدي الغاضب ونقلنا كل هذة الأمور بشكل واضح وصريح وبأكثر شفافية.
